» » “Ramin Bayramlının könüllü şəkildə istefa verdiyinə inanmıram” – Tural Abbaslı

“Ramin Bayramlının könüllü şəkildə istefa verdiyinə inanmıram” – Tural Abbaslı

 |  14-09-21 14:38  |    271      Sosial

"Ramin Bayramlının könüllü şəkildə istefa verdiyini düşünmürəm. Çünki pandemiya başlayandan bu yana aylardır, bu adamın fəaliyyəti tənqid edilir, yarıtmaz olduğu deyilir. Bir çox hallarda hətta korrupsiya faktları da ifşa edilirdi”.

Bunu Sfera.az-a açıqlamasında AĞ Partiya sədri Tural Abbaslı deyib. O bildirib ki, sabiq TƏBİB sədrini Azərbaycan siyasi səhnəsində ondan çox tənqid edən ikinci adam yox idi:

"Güman ki, Ramin Bayramlıya könüllü şəkildə ərizə yazması ilə bağlı mesaj verilib. Onun bu addımı etik dəyərlərə görə atdığına, yaxud "mən bacarmıram, könüllü gedirəm” deməsinə inanmıram. Bacarmırdınsa, illərdir səhiyyə sistemimizi niyə bu günə qoyurdun? Bir səhiyyə məkanında üç orqanın – Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB-in fəaliyyətinə ehtiyac yoxdur. Düzdür, TƏBİB İcbari Tibbi Sığorta üzrə Dövlət Agentliyinə tabedir, amma müstəqil qurum kimi fəaliyyət göstərir. Məsələn, həkimlər, tibb bacıları, səhiyyə müəssisələri bu gün də hara tabe olduqlarını bilmirlər”.

T.Abbaslı paralel strukturların ləğv edilməsinin tərəfdarı olduğunu qeyd edib:

"Səlahiyyət bölgüsündə problemlər yaranır və məsuliyyət ortalıqda qalır, hər kəs bir-birinin üzərinə atır. Şəxsən mənim başıma gələn problemdir. Büdcə vəsaitlərinə qənaət olunması baxımından, təklifim odur ki, Səhiyyə nazirliyi də, TƏBİB də ləğv olunsun və bütün səlahiyyətlər İcbari Tibbi Sığorta üzrə Dövlət Agentliyinə verilsin. Əgər biz tibbi sığorta sisteminə keçiriksə, bütün səhiyyəmiz bundan asılı olacaqsa, o zaman elə İcbari Tibbi Sığorta üzrə Dövlət Agentliyi bu məsələləri tənzimləsin. Yaxud  Səhiyyə nazirliyi qalsın, bu iki struktur ona tabe edilsin. Qarmaqarışıqlıq aradan qaldırılmalıdır ki, insanlar da öz işlərini bilsinlər. Hər başdan bir səs çıxır və nəticədə milyonlarla pul xərclənir. Hətta pandemiya dövründə milyardlarla pul xərcləndi, amma yoluxma, ölüm sayları eyni vəziyyətdədir”.

 
Günay Rəsulqızı